Azkenaldi honetako boom-a dira weblog edo bitakorak. Weblog edo bitakorak funtsean webguneak dira, baina bertan egileak, sarri, informazio berriak gehitzen ditu. Idatzitako testuak dataren arabera ordenatuta ageri dira, berrienak goikaldean. Itsasuntzi baten bitakora kaieraren edo eguneroko pertsonal baten antzera, egun bakoitzean gertatutakoak isla ditzake weblog batek edo guk nahi dugun maiztasunez, azken finean, egilea baita kontrol osoa daukana. Definizio horretatik abiatuta, era guztietako weblog-ak daude sarean. Weblog batzuk kolektiboak dira, normalki gai baten ingurukoak izaten dira eta jende multzo jakin batek idazten du bertan, gai horren inguruan asko dakitenak edo interes berezia dutenak. Beste bitakora batzuk pertsonalak dira: pertsona bakar batek idazten du bertan eta berak nahi duen gaiari buruz, nahi duen hizkuntza erabiliz eta nahi duen beste luzatuz. Gaiaren arabera sailkatuz gero, badira futbola: http://www.friendster.com (http://www.santamaradona.org), zientzia (http://www.divulcat.com), surf-a (http://www.kleim.org/b2/), zinea, literatura (http://barataria.alonsoquijano.org), bideojokoak eta beste hainbat gairi buruzko weblogak. Burura etor dakizukeen edozein gairen gaineko bitakoraren bat izango da, seguru. Euskaraz ere badira bitakora kolektiboak, Sustatu (www.sustatu.com) kasu, edo pertsonalak, Taxi Galduak (http://taxigalduak.blogspot.com) bezala. Badira bitakoren direktorioak, bitacoras.com (http://www.bitacoras.com) edo bitacoras.net (http://www.bitacoras.net) kasu, baita bitakoretan edukiak aurkitzeko bilatzaileak (http://www.webloabout.com) ere. Nork bere zaletasunak, iritziak edo paranoiak islatzeko erabili ohi du bere bitakora. Diseinuan edo argazkilari moduan ona zarela uste baduzu eta zure trebetasuna jendeak mirestea nahi baduzu, ez dago bide hoberik gai horri buruzko weblog-a sortzea baino. Hortaz, badira gai bakar baten inguruko weblog pertsonal asko ere. Esaterako, argazkizale honek (aramaio.com) bere kamara digitala erabiliz eginiko argazkiak erakusten ditu weblog baten bidez. Testuak barik argazkiak biltzen dituzten bitakorei photolog esaten zaie eta telefono mugikorrekin hartutako argazkien argazkiak biltzen dituztenei moblog izena jarri diete. Weblogger esan ohi zaie bitakorak egiten dituztenei eta euren artean harreman handia izaten dute. Antzeko zaletasunak islatzen dituztelako edo lagunak direlako, batak bestearen weblog-an irakurri duenari buruzko aipamenak egin ohi dituzte. Egungo bitakoren beste ezaugarri bat irakurleek idatzitakoari buruzko iritzia emateko aukera da. Bitakora batean agertutakoari buruzko iruzkinak idatz ditzakegu, informazioa gehitzeko edo gustatu zaigun adierazteko. Kazetaritzan eragina Weblogger askok seriotasunez hartu dute gai baten inguruan idaztearen ardura, oso bitakora ospetsuak dituzte eta euren informazio zein iritziak arretaz irakurtzen dituzte internautek. Kazetaritza zuzena egiteko modua bilakatu dira bitakorak, hedabiderik gabekoa, Irak-eko gerratik informazioa idatzi duten weblogger batzuk ospetsu bilakatu dira. Editorea kazetari-internauta bera da eta enpresa (egunkari edo argitaletxea) ez da jada ezinbestekoa informazioak zabaltzeko. Etorkizunean kazetaritza era berri honek izango duen eragina eta bilakaera aztertzen ari dira adituak (http://www.congresoperiodismo.com). Editatzeko errazagoak Beste ezaugarri bat badute weblog-ek ohiko webguneen ondoan: eguneraketa erraza eta automatikoa dute, horregatik webgune dinamikoak direla esan ohi da. Ohiko webguneetako orrialdeak HTML orrialdeak dira eta estatikoak dira, geuk diseinatu behar ditugu banaka gure ordenagailuan eta gero sarera igo. Ohiko webguneak egiteko, orrialdeak maketatu behar ditugu banaka (HTML diseinua esaten zaio). Horretarako programa bat beharko dugu, Dreamweaver, FrontPage edo GoLive kasu. Web diseinuaz aparte, jakintza teknikoa ere eskatzen digu webguneak "eskuz" egiteak eta oso nekagarria da orrialde asko gehitu behar ditugunean. Horregatik sortu dira webgune dinamikoen kudeaketarako sistemak. Sistema horiek aurrez ezarritako diseinu baten gainean eraikitzen dira berez, guk soilik informazioak idatzi behar ditugu eta sistema automatizatu horrek jarriko ditu testuaren titularrak hasierako orrialdearen goikaldean, eta orrialde bat sortuko du albiste edo iruzkin horren testu osoa izango duena. Zuk zeuk zurea sortu Hainbat zerbitzu daude weblog bat ezartzeko aukera doan eskaintzen dutenak. Bi motatakoak daude: nork bere webgunean instalatu behar duen aplikazioa ematen dutenak eta euren zerbitzarietan ezarrita dagoen zerbitzua eskaintzen dutenak. Lehenengoek aukera gehiago eskainiko dute, Movable Type-k (http://www.movabletype.org), Pmachine (http://www.pmachine.com) edo Greymatter (http://www.noahgrey.com/greysoft) kasu, baina hasteko hobe izango dugu bigarren multzoko bat aukeratzea. Geroago, bitakoragintzari gustua hartzen badiogu, akaso sistema aurreratu horietako bat nola ezarri ikasteko denbora izango dugu. Zerbitzu horietan doan emango digute ostatu birtuala eta euren bitakoraren kudeaketa sistema erabiltzeko aukera, baina normalean hori publizitatea jartzearen truke egiten dute. Hauetan ezagunena Blogger (new.blogger.com) dugu, berriki Googlek erosi duen zerbitzua. Honen webgunea ingelesez dago eta ez dago momentuz horrelako zerbitzurik euskaraz eskaintzen duenik. Beraz, agian gaztelaniazko Zona libre (http://www.zonalibre.org), bitacoras.com (http://www.zonalibre.org) edo Blogia (http://www.blogia.com) edo Grafopixel (http://www.grafopixel.com)aukeratuko dugu, doakoak baitira. Gure datu batzuk (benetakoak edo asmatuak) eman ostean, bitakora eraikitzen hasteko pasahitza emango digute.