Gero eta informazio gehiago eta iturri ezberdinetatik jasotzeko aukera dugu. Euskaraz ere aukera asko ditugu. Berria.info euskarazko egunkaria eta bere webguneaz gain, azken urteetan beste hainbat ekimen interesgarri sortzen joan dira informazioaren inguruan. Hauetako batzuk ikusiko ditugu.

Zuzeu.com: Beraien burua internetzaleon albistari horizontala bezala definitzen du. Bertan kazetariak, kolaboratzaileak eta kanpoko hainbat iturri batzen dira, informazio interesgarriak bilduz. Ez dauka lerro editorial berezirik, batez ere jendearen ekarpenek egiten baitute hedabidea. Orain urtebete ireki zen eta hori ospatzen ari dira.

Sustatu.com: Interneteko albistegi honetan teknologia, kultura eta euskarari arreta berezia jartzen diote. Arduradun eta kolaboratzaile sare batek idazten du gehienetan, baina informazioak bidaltzeko aukera ere ematen dute.

Zabaldu.com: Hedabide berezi honetan ere jendeak bidaltzen du informazioa. Normalean beste hainbat lekutako informazioa izaten da. Informazio horiek zerrenda batean metatzen dira eta jendeak bozkatzen ditu. Gehien bozkatutako albisteak portadara pasatzen dira. Horrela denon artean erabakitako albisteekin eraikitzen da hedabidea.

Indymedia Euskal Herria: Informazio alternatiboa ematen duen hedabide irekia. Erdiko zutabea asanblada ireki batek erabakitzen du, posta zerrenda baten bidez. Alboko zutabean aldiz edozeinek idatz dezake. Azken aldian gutxiago erabiltzen bada ere, oraindik hedabide interesgarri bat da.

Kazeta.info: Iparraldeko informazioa ematen duen euskarazko hedabidea. Albisteez gain, blogosfera atal bat ere badauka. Bertan iparraldeko gaiekin lotura duten zenbait blog eta blogarien informazioak batzen ditu. Harpidetzaz posta elektronikoz egunero jasotzeko aukera ere ematen du.

Hitza.info: Informazio lokala ematen duten Hitzen eta beste tokiko hedabideen informazioa metatzen duen webgunea da. Bakoitzak erabaki dezake zein herritako informazioa jaso nahi duen.

Topatu.info: Gazte informaziorako ataria da. Beraien lema "sentitu, pentsatu, egin eta adierazi". Informazioa eta argazkiak bidaltzeko aukerak ematen ditu. Albisteez gain, izarapeko aholkuak izeneko atal interesgarri bat ere badute.

Euskalblogosfera: Hau beste hedabideekin alderatuta ezberdina da. Euskaraz sortu diren milaka blogetatik batzuk metatzen ditu eta portadan erakutsi. Bertan agertzeko bloga izan behar da. Ondoren bertan egotea eskatzea besterik ez duzu.

Hauekin guztiekin nahikoa ez baduzu, laster jaioko da beste informazio atari bat ere, EuskalHerrian.info izenekoa. Euskarazko informaziorik ez dugunik ezin esan.