Xenpelar Dokumentazio Zentroaren katalogoa prest dago dagoeneko.Bertsolaritzaren Datu-Basea izeneko atariari bdb.bertsozale.com izena jarri diote. Bertsolaritzari buruz bildutako dokumentazio guztiaren gizarteratze-tresna da.
Bertsozaleok, bertso-eskoletako ikasle zein irakasleek, ikerlariek... bertsolaritzari lotutako informazio osoa topatuko dugu bertan.

Bertso saioen agenda, bertsolaritzan aritu edo ari direnen biografia-fitxak, gaurdaino izan diren txapelketa, lehiaketa eta sariketei buruzko informazioa, doinutegia, bertsoak eta Xenpelar Dokumentazio Zentroan jasotako grabazioei buruzko informazioa eskuragarri dugu Interneten. Sekulako altxorra.
1991ean sortu zuen Bertsozale Elkarteak Xenpelar Dokumentazio Zentroa, bertsolaritzaren ondarea bildu, antolatu eta gizarteratuz, maila guztietako ikerkuntza bultzatzeko helburuarekin. Bertsozale Elkartearen egitasmoen dokumentazio lanak burutu eta zerbitzu publikoa eskaintzen du, bere bilduma eta informazioa behar duen ikertzaile, bertsozale eta hiritar guztientzako.

Xenpelar Dokumentazio Zentroaren bilduma batez ere 1980. hamarkadatik aurrerako bertsolaritzaren ondareaz osatuta egon dago, eta horrez gain dokumentazio historikoa ere jasotzen du (bertso-paperak, liburuak, esku-orriak, grabazioak eta abar).

Gaur egun, Villabonako Subijana Etxea da Xenpelar Dokumentazio Zentroaren egoitza, eta bertan dira Bertsozale Elkarteko bulegoak eta Mintzola Fundazioa ere.

Honako atal hauek ditu erabiltzaileontzat eskuragarri.

Fonoteka eta Bideoteka: Grabazioen bilduma formato desberdinetan.

Bertsoteka: Bat bateko eta idatzizkoen bilduma formato guztietan.

Fototeka: Argazkiak eta erreportajeak.

Hemeroteka: Bertsolaritzari buruz idatzi den guztia dago bertan.