Bizkaiko Eskolarteko finalak jokatu ziren Iurretan. Bizkaiko Ikastolen Elkarteak eta Bizkaiko Bertsozale Elkarteak antolatu dute elkarlanean. 

Aurten 28 parte hartzaile egon dira bat-bateko txapelketan eta lau kanporaketa jokatu dira: Galdakaon, Igorren, Gordexolan eta Durangon. Zortzi bertsolari heldu ziren finalera: Aiala Irurtia, Ekhi Zuluaga, Enara Gallastegi, Iradi Barrenetxea, Jon Abasolo, Kelmene Abaitua, Maddi Aurtenetxe eta Naroa Iturrioz.

Zortziko handian eta txikian ofiziotan egin zuten gazteek eta, ostean, bakarka gaiari erantzun. Ariketa horiek egin ostean, Enara Gallastegi eta Ekhi Zuluaga izan ziren buruz-burukora sailkatu zirenak. Puntuari erantzun eta gai bati bertso bana bota behar izan zuten atal honetan.

Buruz burukoa jokatu ostean, Enara Gallastegik batu ditu puntu gehien eta 2025ko Bizkaiko eskolarteko txapela lortu du. Ekhi Zuluaga geratu zen bigarren. Biek ordezkatu zuten Bizkaia Euskal Herriko eskolarteko finalean.

Idatzizko lana plazaratuz

Goizean DBH eta batxilergoko idatzizko finala jokatu zen. Apirilean eta maiatzean herri eta eskualdeetan egin zituzten kanporaketak. Idatzizko sariketako saridunak:

DBH1

 Aietxu Basterretxea (Bilbo- Begoñazpi Ikastola)

 Ane Makazaga (Zornotza- Andramari Ikastola)

 June Gondra (Bermeo-Eleizalde ikastola)

DBH2

Araitz Elorza (Iurreta-Juan Orobiogoitia)

 Lur Oiartzabal (Larrabetzu-Txorierri BHI)

 Jare Baliño (Bilbo-Solokoetxe BHI)

DBH3-DBH4-Batxilergoa

 Iraia Lauzirika (Zornotza- Urritze BHI)

 Ekain Menika Arantzazu-Igorre BHI) 

Haizea Rotaetxe (Markina-Xemein- Markina BHI)

Euskal Herriko bertsolari gazteen ahotsak

Arantzan izan zen saioa eta herrialde guztietako 13 bertsolari aritu ziren kantuan.

Goizeko 11:30ak aldera hasi zen ekitaldia.  Ekhiñe Zapiain eta Josu Txoperena biak eskuz esku aritu dira aurkezten eta gaiak jartzen. Gogoz abestu zuten hamahiru bertsolariek: Bizkaitik, Enara Gallastegi eta Ekhi Zuluaga; Gipuzkoatik Egiar Otegi eta Suhar Gesala, Arabatik Jokin Onaindia eta June Astegieta, Nafarroatik Kattin Madariaga eta Kattalin Lizarraga eta iparraldeko ordezkariak; Nahia Etcheverry, Unax Aizpurua, Goizane Etcheverry, Amaiur Aizpuru eta Leina Alkhat.

Saioaren lehen atalean, binaka aritu ziren. Lehendabizi, gaia emanda zortziko handian eta bina bertso zortziko txikian. Bigarren atalean banaka jardun zuten. Lehendabizi, lehen puntua emanda, bertso bat osatu zortziko txikian eta gaia emanda, bertso bat gehienez, hamarreko handian, Bertsolariek beren lanak eginda, epaileen lanaren zain egotea egokitu da. 2025eko Euskal Herriko Eskolarteko txapeldunaren izena esan zuten: Unax Aizpurua Ibagarai. Txapeldunordea Nahia Etcheverry Lopepe izan zen.