Azken urte hauetan fama handia hartu du Adimen Artifizial (AA) bezala ezagutzen dugun teknologiak. 2022ko urte amaieran OpenAI enpresak ChatGPT atera zuen unean, mundu digitalak beste dimentsio batera egin zuen jauzi, eta ikusi genuen zein nolako indarra lortzera ailegatu zitezkeen teknologia digitalak. Hizkuntza-eredu handiak, edo LLM bezala ezagutzen dugun teknologia honen bitartez, aukera ematen digu ordenagailuari zerbait eskatu eta, modu harrigarri eta azkar batean, erantzun oso landuak jasotzeko. Batzuetan, erantzun zuzenak jasotzen ditugu baina, beste batzuetan, aldiz, akatsak ere izaten dituzte. Horretaz gain, irudiak edo beste mota askotako multimedia edukiak ere sortzeko gai dira. Batzuk magiaren pare jarriko dute teknologia hauek egiten dutena, eta ez da harritzekoa.

Hala ere, azken aste hauetan, ChatGPTri konpetentzia gogor bat azaldu zaio: DeepSeek txinatarra. Teknologia berri honek, panorama berri bat ireki du mundu digitalean, izan ere, askoz ere baliabide eta bitarteko gutxiagorekin, bere lehiakideen pare egon daitekeela erakutsi du. Honek lurrikara handia eragin du Estatu Batuetan, eta OpenAI enpresan, bereziki; hasiera batean beraiena bakarrik zen teknologiak, aurkari berri bat topatu duelako. Gainera, produktu bera askoz ere kostu gutxiagoan sortu daitekeela erakutsi dute.

Garbi dago AA bezala ezagutzen dugun teknologiak aldaketa bat eragin duela gure jardun digitalean; orain gauza guztiek AA dutela dirudite. Hala ere, jakin beharra dugu mota honetako teknologiek nola funtzionatzen duten. Aurretik esan bezala, teknologia hauek erantzun bat edo beste ematen badigute, zerbaitengatik da. AAk entrenamendu bidez funtzionatzen du, baina zer esan nahi du horrek? AA martxan jartzen duten ordenagailuek datu eta informazio asko jasotzen dituztela; milaka eta milaka testu eta irudi irakurri eta jasotzeko gai dira. Ondoren, jasotako informazio guzti hori, memorizatu egiten dute (gizakiok azterketetarako egiten dugun bezala) eta, bukatzeko, ikasitako informazio horren baitan, emaitza bat ematen digute. Horregatik, eskaintzen dizkiguten erantzunak, nolabait, baldintzatuak daude jaso dituzten iturrien eta entrenatu diren moduen arabera. Hau guztia jakinda, bi tresna aurkeztu nahi ditut AAk nola funtzionatzen duen modu errazean erakutsi eta norberak bere modeloa, sinpleki, sortzeko aukera ematen dutenak.

Machine Learning for Kids: Online plataforma honen bitartez, bertako erabiltzaileei Ikaskuntza Automatikoaren (Machine Learning) munduan murgiltzeko baliabideak eskaintzen zaizkie, hots, Adimen Artifizialaren muinetako teknologia batean. Doako kontu baten bitartez, erabiltzaile bakoitzak hitz, soinu, irudi edo zenbakietan oinarritzen den bere modeloa sortu dezake. Modeloa entrenatzeko, norberak sartu behar ditu nahi dituen edukiak eta horren baitan entrenatzen da ordenagailua. Emaitza bezala, norbere modeloa lortzen da. Ondoren, modelo hori, beste plataforma desberdinetan ere integratzeko aukera eskaintzen du.

LearningML: Aurreko tresna bezala, Ikaskuntza Automatikoan oinarritutako modeloak modu erraz eta doakoan sortzeko aukera eskaintzen duen online plataforma da. Kasu honetan, hitz, irudi eta zenbaki bidez entrenatutako modeloak sortu daitezke. Ondoren, beste plataformetan ere integratzeko aukerak eskaintzen dituen baliabidea da.

Oso modu errazean, norberak bere modelo propioak sor ditzake. Aukera onak dira ChatGPT eta DeepSeek tresnek, modu sinplean, nola funtzionatzen duten aztertzeko eta ikasleekin batera lantzeko. Ikaskuntza Automatikoan murgiltzea aukera ona da. Saiatu eta sortu zure Adimen Artifizial tresna sinplea!