Euskal Herria une onean dago ziklo-kros-aren barnean. Bere garaian David Seco bezalako kirolari bikainari lekukoa hartuko dion bolondresen bat ageri zaigu, eta horrela, euskal txirrindularitzaren disziplina honen barnean dagoen tradizioa berretsi. Ezbairik gabe, azken garaietan indartsuen agertzen den izena Egoitz Murgoitio abadiñotarrarena dugu. Bizkaitarrak bere heldutasuna lortu duela ematen du, eta hortarako adibiderik egokiena Laudion burutu zen Euskadiko txapelketa izan genuen. Bertan hautagaitzarik gogorrena Murgoitiorena zen ezbairik gabe, izan ere, denboraldia hasi zenetik emaitzarik onenak erdietsi ditu, eta horri gaineratu behar zaio Estatuko Kopa irabaztetik zetorrela Murgoitio, Alcobendas-en lorturiko garaipen distiratsuaren ondoren. Halere, kinieletan beste aldagai bat bazegoen, izan ere, abadiñotarrak Munduko Kopako lasterketan min hartu zuen orkatilean, eta hala, fisikoki erabat gai izango ez zenaren susmoa azaltzen zen. Denarekin, garaipena hasiera hasieratik bideratu zen Hirutek taldeko kirolariarengana, hasiera marratik bere nagusitasuna berretsi baitzuen eta denbora tarte zoragarriak burutu. Garaipenak balore gehiago hartu beharko luke arerio Javier Ruiz de Larrinaga eta Aitor Hernandez bezalako izen boteretsuak zituela kontutan hartuz gero.