Orain arte mugikorrean irratiak entzun nahi bagenituen gure mugikorrak irrati entzungailua izan behar zuen. Irrati entzungailua ez da oso ohikoa telefono guztietan, azken belaunaldiko mugikorretan Internet edukitzea ohikoagoa da, irrati entzungailua baino. Horri eskerrak Internet erabiliz irratiak entzuteko aukera dago eta hori da zehazki Uhinbak mugikorrentzako aplikazioak eskaintzen diguna.

Irratiei buruz hitz egin dugu, baina kontutan izanda euskarak irratietan duen hedapen kaxkarra, aplikazio honek euskarazko irratiak ditu jomuga. Honi esker zabalkunde mugatua duten irratiek hedapen zabalagoa lor dezakete bere ingurutik haratago. Aldi berean, irrati banda ez duten zenbait euskal irratik bere hedapenerako bide bakarra Internet da; honi esker mugikorretan ere jarraitu ahal izango dira

Aplikazioa momentuz, iPhone eta Android sistema eragilea erabiltzen duten mugikorrentzako dago. Sistema eragile hauen aplikazio biltegietan lortu daiteke aplikazioa. Horretaz gain, beraien webgunetik bertatik ere jaisteko aukera ematen ditu Android eta iPhone bertsioak.

Irrati bakoitza entzuteaz gain, bere programazioa ikusi eta webgunea kontsultatzeko ere aukera ematen du aplikazioak. Momentuz hauek dira entzun daitezkeen irratiak.

• Antxeta Irratia (Hendaia-Lapurdi)
• Bilbo Hiria Irratia (Bilbo-Bizkaia)
• Bizkaia Irratia (Bilbo-Bizkaia)
• Euskal Irratiak: Gure Irratia (Uztaritze-Lapurdi), Antxeta Irratia (Hendaia-Lapurdi), Xiberoko Botza (Maule-Zuberoa), Irulegiko Irratia (Donibane-Garazi-Nafarroa Beherea)
• Euskalerria Irratia (Iruñea-Nafarroa)
• Hala Bedi Irratia (Gasteiz-Araba)
• Ttan Ttakun Irratia – 106.8FM (Donostia-Gipuzkoa)
• Txolarre Irratia (Anoeta-Gipuzkoa)
• Xiberoko Botza (Maule-Zuberoa)
• Xorroxin Irratia (Elizondo eta Lesaka-Nafarroa)

Etorkizunean irratiekin egindako gauza bera telebistekin ere egitea espero dute. Horrekin batera albisteak ere ematea eta sare sozialen bidez elkarrekintza bilatzea ere garapen planetan daude.Horretaz gain, sortutako aplikazioa software librea da eta beraz bere kodea beste guztientzat erabilgarri egongo da berrerabili ahal izateko.

Dudarik gabe interesgarria den aplikazio bat, batez ere euskal irratigintzari ikusgarritasuna emateko. Erabiltzaileekin elkarrekintza landuz gero oraindik beste dimensio bat izan dezakeena dudarik gabe.