Jabier Muguruzak bere hamaikagarren diskoa aurkezten digu oraingoan, "Bikote bat" titulupean. Obra honetan, muturreraino eraman dira Jabierren ibilibide entzutetsuan hain ohikoak diren giro intimista eta isiluneen erabilera. Bakar-bakarrik Mikel Azpirozen pianoa eta Muguruzaren ahotsa eta akordeoia topatuko ditugu bertan, tarteka Mireia Otzerinjauregiren koroen laguntzaz.

Kantak, euskal poeta handien testuetatik abiatzen dira, dagoeneko kantariaren ohiko kolaboratzaileak direnak: Bernardo Atxaga, Iñaki Irazu, Harkaitz Cano, Gerardo Markuleta, José Luis Padrón... gehi oraingo honetan aurrenekoz azaltzen direnak: Lourdes Oñaederra, Rikardo Arregi eta Javier Rodriguez Marcos.

Diskoaren grabaketa bi fasetan burutu zen: aurrena, El Vendrelleko Auditori-n, non Mikel Azpirozen pianoak grabatu ziren, eta bigarrena "Katarain" estudioetan , Azkaraten (Nafarroa), Angel Gonzalez Katarain teknikariaren ardurapean; han, Jabierren ahotsa eta eskusoinua grabatu ziren, baita Mireia Otzerinjauregiren ahotsa ere.

Azken emaitza, orain esku artean duguna, Irungo artistaren obrarik helduena, testu ederrez hornituta, konposizio-maila bikaina eskaintzen diguna. Entzulea berehala jabetuko da Mikelen piano leunaren eta Jabierren ahots hurbilaren uztarketak lortzen duen emaitza eder eta liluragarriaz.