Bakarlari izenarekin agertu arren Antton, talde baten izena da. Ez dira musika munduan berriak eta durangaldean beraien izenak Lor taldearekin lotuta ikusi ahal izan ditugu orain arte.

Antton: ''Hitz txiki handiez'' entzun edota deskargatu hemen.

Kantariaren izena hartu badute ere, talde proiektua da eta Lor taldearen errautsetatik jaio da. Antton (abeslaria), Lor taldeko Lander Irazola (gitarra, ahotsa) eta Rami Unzeta (bateria), Mikel Nuñez (teklatuak) eta Txaber San Pedro (baxua). "Gorantz erori" du izena talde berri honen estreinako diskoak eta aste honetan bertan kaleratu dute Baga-Biga zigiluarekin.

Nabari da disko honetan kanpoko -Ingalaterra eta Estatu Batuak- taldeen eragina jaso dutela. Batetik kantagintzaren tradizioari helduta eta bestetik power pop doinuko taldeen eragina. Genero bien uztarketak ekarri ditu taldearen abesti berriak.

Estreineko lan honetan kolaborazio ugari izan dituzte, kasuan kasu, Aiora Renteriak (Zea Mays) ahotsa jarri du "Ohe hutsegiak" kantan. "Hartu arnasa" abestiaren hitzak Sustrai Colinak idatzi ditu eta beste kanta bat Amets Arzallusen, Sustrai Colinaren eta Endika Zarrabeitiaren bertso batzuetan dago oinarrituta. "Gorantz erori" diskoaren izenburuaren esanahi literalari begiratuta, gorantz erortzea "zutunik jaustea" moduan ulertzen dute taldekideek, hau da, zortea edukitzea.

Pop ikutua duten kantuak dira rock sendo eta bizi batekin jantziak.