Elkar diskoetxeak disko sorta ederra plazaratuko ditu datorren udaberrian.

"Gailurrak ikutuz" deituko da Kupela taldearen disko berria eta Martxoaren 22an plazaratuko da. Bertsolaritzari buruzko bilduma monografiko erakargarri bat osatu dute. Kupelaren ohiko erromeria eta plaza kutsua baztertu gabe.

Apirilaren amaieran Anje Duhaldek iaz Ondarroako Kafe Antzokian grabatutako "Ibilean" diskoa aurkeztuko digu. Zati bat akustikoa da eta bestea elektrikoa. Errobiren hasierako garaietatik egundaino egindako ibilbidearen errepasoa azaltzen da berton.

Maiatzaren hasieran Lauroba talde Donostiarrak "Iglu bat basamortuan" izenburuarekin plazaratuko du pop-rock doinuak dakartzan diskoa.

Maiatzaren erdialdean ere "Erraiak" lana ikusiko dugu kalean, Xabier San Sebastian kantariaren abesti bilduma berria. Oraingoan rock'n'roll doinuak eskeiniko dizkigu.

Azkenik, maiatzaren 18an, Bilboko Euskalduna Jauregian, zuzeneko lehen emanaldiarekin batera, Benito Lertxundi kantariaren disko berria entzuteko aukera izango dugu. "Oroimenaren oraina" deituko da diskoa eta aurtengo udaberrian plazaratuko diren disko esanguratsuenen artean aurkitzen da.