Jai giro aparta izango dogu datorren 4rriaren 4ean Bilboko Kafe Antzokian. "Zuloak" pelikularen inguruan jai berezia antolatu da honetarako. Batetik Zuloak rock taldea zuzenean arituko da bere disko berria aurkezten eta bestetik Asthmatic Lion Sound Sistema. Proiektu honen atzean euskal musikagintzan eskarmentu handia duen artista aurkitzen da, Fermin Muguruza bera.

Tania de Sousa abeslariak, Ainhoa Unzueta gitarristak eta Uxua de la Fuente Ursula Strong bateria jotzaileak osatzen dute Zuloak taldea egun. Diskoa Bonberenean grabatu dute. Karlos Osinaga Lisabo taldeko baxu jotzaileak eta Fermin Muguruzak ekoitzi dute diskoa. Talka Records & Films ekoizpen etxearen zigilupean atera dute. Haien kantuetan, besteak beste, sexuaren, askatzeko gogoaren eta abortuaren inguruan hitz egiten dute. The Cramps, White Stripes, L7, rock'n'rolla, punk doinuak, jarrera... Zuloak taldeak badu zer eman.

Taldea, desagertu eta gero egin da ezagun. Proiektua Arrate Rodriguez artistak sortu zuen. Andy Warholek Velvet Underground sortu zuen legez, bere taldea sortu nahi izan zuen artistak ere. Musikarien egitekoa bideo bidez dokumentatu, eta taldea desegin eta gerora, material guztia Eider Rodriguez idazleari —bere ahizpari— pasatu zion, eta hark, Muguruzari. Taldea berriro bildu da filmaren aurkezpenaren harira.