Ekhi Zuluaga Intxaurbe igorreztarra da. Arratiako Bertso eskolako kide honek 2024 eta 2025 urteetan Bizkaiko eskolarteko buruz burukoa jokatu du eta Arantzan, Euskal Herriko eskolarteko finalean ere abesteko aukera izan du azken bi urteotan. Txapelketetan ez ezik, plazaz plaza ere eman ditu lehen pausoak eta udako oporraldia aprobetxatu dugu berari egindako bideaz eta etorkizunari buruz hitz egiteko.

Nondik datorkizu bertsozaletasuna?

Hasiera baten familiatik, bertsozaleak dira batzuk eta txapelketa ikusten zutenean edo Hitzetik Hortzera ikusten zutenean nik ere ikusten nuen. Eskolan bertsolaritza eman eta gustatzen hasi zitzaidan.

Zer da bertsoaren bidez lortzen duzuna?

Bertsoaren bidez lagun asko egiin ditut eta horretaz aparte euskararekin askoz ere harreman estuago bat edukitzera eraman nau. Baita asko ikastera ere, edozein motatako gaiei buruz edo plaza mota ugaritan kantatu behar izan dudanez gauza asko ikasi ditut.

Zer beharko luke bertsolariek zuen adineko gazte gehiagorengana iristeko?

Bertsolaritzak gazteengan duen irudia txapelketa da eta bertan dagoen lehia ikusten du gazteriak, bertako seriotasuna etab. Bertsolaritza lehia baino gehiago dela jakitean eta plazetan seriotasun hori galtzen dela jakitean gehiagorengana iritsiko zela uste dut. Bertsolariak berak ez dut uste errurik duenik.

Zortzi bertsolaritik sei neskak izan dira eta bi mutil. Argazki horrek zerbait berezia izan nahi du?

Bertsolaritza aldatzen ari dela esan nahi du. Bertso eskoletan neska kopurua asko igo da eta txapelketan plazaratzen den neska kopurua ere bai. Lehen ikustea ezinezkoa zen hori. Gero eta gehiago gertatzen ari da eta hori gauza positiboa dela uste dut.

Errugbi jokalaria ere bazara. Talde lana garrantzitsua da errugbian. Bertsotan ere talde babesa garrantzitsua al da?

Errugbian taldean lan egin gabe ezin duzu ezer egin eta bertsolaritzan antzeko zerbait gertatzen dela uste dut. Talde babesak eta talde giroak asko laguntzen dute bertsolaritzan eta horregatik askoz ere gusturago egiten da bertsotan besteek lagunduko zaituztela dakizunean.

Aisialdia eta bertsolaritza nola uztartzen dituzue?

Azken batean bertsolaritza nire aisialdiaren parte bihurtu da eta egunaren edozein momentutan agertu daiteke. Lagunekin, kirolean edo beste gauza batzuetan gozatzen dudan erara gozatzen dut bertsotan eta horrela erraza da dena uztartzea.

Ze bertsolarirekin kantatuko zenuke gustora?

Aitor Sarriegi eta Sustrai Colina asko gustatzen zaizkit eta beraiekin gustora kantatuko nuke beraien umoretik publikoarekin konektatzeko duten gaitasunagatik gustatzen zaizkit.